Diary<一休記事簿>Diary
Warning:
喂! 呢度係一休最深的一處地方,記住睇完就算,唔好周圍同人講!!!!!
13-6-2000
今日個homepage終於有個雛形睇下,不過真係好失禮.尤其睇完Henry個7B.com就......,不過唔緊要啦,盡力就算,總算還了心願,做IT人!
14-6-2000
今晚用左一晚去整個竇,希望真係有人睇啦.不過其實我整homepage個主要目的都係比個地方自己發"up"風.我最想做好d個part係"一休的朋友",因為關乎好多人的"名譽地位",所以要做好D!!!
15-6-2000
又多左野,今日完成左"一休音樂廳",推薦左幾張唱片比大家,希望大家都介紹番D比我!!!今日又同大家講左點解叫一休,都算係0甘啦!!!幫0下手,簽簽message board,OK??
17-6-2000
今日好悲慘呀!!!!!!一休差d"咬舌自...."呀,因為實在太熱氣,所以唔小心一0野0甘咬落條"利"度,真係痛到入心入肺!!!!睇怕未來幾日都會變左"痴利根",慘慘慘........ :< 所以係度奉勸大家少食熱氣0野!!!!
24-6-2000
一休又好黑啦,今日同爺爺/"女麻女麻"打牌,結果一休慘烈地犧牲左200大洋~~,本來好唔開心,但想想後又想到就當請他們飲茶吧,自己人嘛!亦係一個好好的教訓比自己,以後唔好打多,亦忠告大家~"小賭怡情,大賭亂性",OK?
今日已是24/6啦,想講d大家唔想聽,但又冇得逃避的話題~7/7 AL 放榜,其實一休都緊張,不過都同大家講一句,試已經考完,無論如何,唔好0甘緊張啦,因住個心都跳埋出來!
一休份工返埋下星期就冇得返啦,又要由中環人變番旺角仔,有點灰姑娘feel,哈!時間真係過得好快,份工雖然幾悶,不過好開心,有d唔捨得班同事,Dora/Rita/Brian/Sarah,希望以後仲有機會見面啦!!!
28-6-2000
六月尾啦,大家都差不多放假,希望大家都好好玩番一下!!!一休今個禮拜日至二會同同學去camp,趁放榜前玩番次勁.係度呼籲下各位7B同學們一齊去啦,機會難逢,得閒都一齊去啦!!!!
1-7-2000
回歸三年啦,再冇乜特別,都係0甘過,希望大家放假都RELAX一下啦
4/7/2000
一休一去完camp返來就即刻update,勤力嗎??今日一休換左新Mobile,係8210.其實原本想換Panasonic GD92,但聽人講部機唔係0甘抵,而且今日見過真身,結果幾失望,因為外表好似仲大個GD90.
6/7/2000
本來想係呢度講下AL,但想清楚後,都係開過一版好過,大家有乜想講,都可以去0個度講0架!!
15/7/2000
成個星期冇update,實在太懶啦,所以特登開頁新0野,支持下!!!星期一睇Kelly演唱會,睇報紙好似好正,下星期同大家講下!!!
17/7/2000
今晚睇左Kelly個Concert,亦特登開左一頁,睇睇呀!一休琴日剪左頭髮,都好耐冇試過0甘短,不過一休覺得幾好,而且容易打理,亂0甘落gel,"chow"幾"chow"就落得街,幾正!
23/7/2000
又成個禮拜冇update,所以特登用D時間整整,加左D Kelly concert 的相,旁邊的歌詞係Kelly果時唱緊,不過唔知有冇記錯,如果大家發現有錯,"單"聲一休呀!
前日去完書展,又係得個逼字,又乜都買唔0岩,所以一休決定以後冇乜必要都唔去啦!
28/7/2000
呢排一休真係悶都嘔 :< !!!所以都冇乜可以同大家分享,不如大家有D乜好活動,都同一休分享一下呀!其實一休好想去旅行0架(搭飛機果挺哩!),不過都8月啦,唔知有冇機會去,大家知啦,0甘難得放"長"假,點都想豪一豪佢嘛!
30/7/2000
今日一休做左一項創舉,就係寫散文"源是一休",一休希望以後可以最少一星期可以有一篇新作,希望大家欣賞一下,比些少意見!
8/8/2000
聽日係會考放榜,希望各位F.5同學都"順利過渡"啦!
呢幾日一休都返左學校幫手,發覺成間學校都爛晒,不過係因為大裝修,各位師弟師妹就好啦,有新大樓,有新鋪的球場,仲有好多新0野,希望大家都可以讀得更舒服啦!
星期四到一休大學放榜,心情又再次變得緊張,希望順利入到1st choice啦, 一休都希望大家都入到1st choice!!!
10/8/2000
大學今日終於放榜了,一休入了2nd choice HKU Environmental Life Science ,本來有些少失望,始終唔係1st choice, 不過一休好快就開心返,因為仲有另外4位朋友都入到同一個系,以後可以繼續做同學,好happy呀!係呢度一休要多謝爸媽and妹妹,因為佢地今朝一早就幫我買報紙對,Arigatou!
19/8/2000
呢排成日都要返HKU辦好多唔同的手續,差不多隔日就去一次,車錢好鬼和味,不過好彩好 快,20分鐘就到.做左0甘多日手續,發覺大學真係一個新開始,乜都要整.但係一休又發覺自己好似同大學唔係0甘"襯",點睇都冇"忽"似大學生,似去參觀多D~
下個禮拜三去O-camp呀!有D緊張,因為驚會玩得好激,不過去得就要預左要玩,所以一休要乜都唔好理,唔好怕,死就死啦!!!
大學有notebook買(唔係Rain要果D"拍子簿":P),一休決定左買最勁果種,盛惠$13520~,不過唔緊要啦,用幾年嘛!!
大學都未開學,但一休已經做左一件後悔的事,就係冇申請宿舍.其實一休一直都冇稔住住hall,因為一休唔想參加太多的活動.但一休再稔清楚後,發覺其實hall係大學生活的一部份,唔住其實好"side",不過想都冇用,都截左止......唉!~唯有怪自己唔稔清楚!!!不過一休真係越稔越心"up",未開始讀就行錯左一步,希望以後唔好再錯... :< 今次亦點醒左一休,就係讀得大學就要拋開晒所以顧慮,唔好乜都唔想唔想,0甘先係大學的生活方式嘛~~
30/8/2000
呢排繼續都好忙呀,又係成日都過海,不過好彩差唔多攪掂晒.未來幾日都應該可以relax一下.其實一休好希望趁今星期,大家都未開學,可以再同班中學同學聚多一次.雖然唔係以後冇得見,不過好多人讀CU,同我地HKU好似"天南地北"0甘,而且timetable又唔同,都幾難可以約得齊人.希望各位好友睇到都響應一下~~
睇番上面先發覺原來一休剪左頭髮都唔夠兩個月,不過一休今日又唔抵得走左去剪,因為想開學有新形象嘛.除左剪短,一休仲搞搞新意思,走左去染左啡色,不過效果唔係幾好,明眼人都未必睇得出,吹脹!!!!!
10/9/2000
聽日返學啦,好緊張又好開心,因為等左成個月終於正式返學,成五個月冇返過學,都驚唔習慣,而且仲係新的環境,希望快d可能習慣啦~
仲有兩日就係中秋節,希望大家都開開心心,同家人/友人/情人....都人月兩團圓啦~~~~
19/9/2000
嘩!開左學成個星期啦,一休覺得好玩又好悶,何解?好玩是那個完全不同的生活方式,好悶是上堂,到而家一休都唔算忙,仲幾得閒添.不過遲D應該會忙好多,因為一休做左ENS班會Welfare Sec. ,負責ENS同學的福利,呢個post對一休係前所未有的大挑戰,各位ENS同學,有D乜0野想我地整,單聲比一休聽呀!!!!!
Welfare Sec. 其實可算係熱身,因為一休遲D想上莊(Society),目標係Science Society,呢個挑戰簡直係有史以來最大的,希望一休能夠應付得來啦~~~
1/10/2000
開o左學三個星期,一休終於開始feel到忙啦,不過唔係讀書忙,而係課外活動,之前講過,一休決定o左上science society呢支莊,未來兩個月都會專注於上莊度,不過一休亦不斷會提醒自已要識得平衡各樣事情,希望各位朋友幫下手,若一休忽略左任何一樣o野,希望大家都單聲!
14/10(星期六)係港大Jupas Open Day,各位中六七o既朋友們,記住o黎ENS個Counter度睇下woo,一休應該都會參與,係度賣下廣告,HKU ENS真係幾好o架!HAHA~~~
<一休的朋友>係不久o既將來應該會有大量的相片出現,因為一休多o左部Scanner,可以自已scan多D相落呢度,不過要睇下有無時間先~~
2/10/2000
今日成日都係屋企update個Homepage,加多o左好多相!!好開心o架,因為多D相吸引D嘛!
25/12/2000
Merry Christmas!!!哎呀...成兩個幾月冇update,因為一休實在太忙啦,今次加多o左好多相,包括大學影果D.
講番u-life,1st sem就o黎完啦,一休實踐o左開學o既承諾:上o左莊,成為香港大學學生會理學會市場秘書
一休係度希望2nd sem可以更加努力!!!
20/3/2001
唉…足足三個月無update，趁今日有D時間搞一搞，費時人o地以為執o左…haha今日心血來潮update一下呢個HP，又半年多啦…睇番先知2000年6月開始整呢個HP，到今日已經一年零八個月o甘耐。
返o左半年學，一休經歷o左無數o甘多事，真係“鑊鑊新鮮鑊鑊金”haha。至於感想，實在不能盡錄，
有都寫o左係三篇文度，睇下啦！！！
下次update時間，…………
17/7/2001
唉〔又係o甘〕…幾個月無update…真係……
Year 1終於完結喇，不過時間真係過得好好好…快，好似讀o左無幾耐o甘就完。不過下年開始無得o甘“他條”啦，因為會比今年多好多o野讀，哈哈！
講番呢個暑假，一休不斷都係為o左O-camp而努力，又大O，又細O。不過其實一休唔係最辛苦果個，一休D莊友做得仲辛苦，尤其是負責Programming o既椒爺同無雙表姐，不過睇住佢地由最初一籌莫展到今日逐漸成形，真係好開心，亦都好期待O-camp來臨！Preparation Work其實都差唔多完成，餘下就係最辛苦亦都最開心o既時刻，就係Orientation各項活動o既來臨，一休希望今年Science Orientation 2001以及ENS Orientation 2001都成功！！！cheer up@@
6/2/2002
今日心血來潮update一下呢個HP，又半年多啦…睇番先知2000年6月開始整呢個HP，到今日已經一年零八個月o甘耐。
講番呢半年，繼續發生o左好多事；大O、細O、台灣行、Yr 2、帶莊、AGM、落莊、考試、放假、敢閣馬交行、再返學、projects……一切一切，都給一休很多很多難忘的回憶。
未來的日子，學業上的壓力越來越重，希望一休與朋友同學們一齊努力呀！